城中鏡：雷軍「4」字圖猜「米」
呢兩年國產手機抬頭，不時都見到有人唔再係揸住iPhone或者「三叔」（Samsung），而係揸住部國產手機，近排唔少人都換咗玩小米手機，而且仲已經換咗幾代添！尋日仲話七月尾又要再追過，原來小米嘅話事人雷軍喺佢個微博上面Post咗張圖，寫住大大隻「4」字，仲要寫話：「小米2014年度產品發布會，7月22日。」圖入面亦有一句「一塊鋼板的藝術之旅」。
雷軍今次喺微博上面故弄玄虛，成功製造話題。（資料圖片）
跟住好多人就猛咁估話嚟緊一定係出小米4手機，但係亦有朋友就話兩個月前小米明明吹風話會出小米3S，仲可能會配備4G，佢就估個「4」字應該係代表小米的4G手機，而嗰塊「鋼板」就好可能係代表小米3S會轉用金屬邊框，又話可能會出小米手環，總之十個人有十一個答案，亦有人覺得雷軍今次喺微博上面故弄玄虛，成功製造話題，市場策略上就好成功啦，至於小米下一樣新產品係乜，睇怕都要等到7月22日先揭曉啦！
