城中鏡：慈善舞后有個「筍盤」囝囝
「慈善舞后」Margaret徐美琪同兒子楊嘉成、東華主席施榮恆等尋日出席《我和世界冠軍有個約會》發布會，Margaret透露跳拉丁舞有五、六年，仲話一個好嘅啟蒙老師好重要，而早前游說佢嘅高難度舞技老師參加黑池大賽，仲攞到冠軍，為港爭光，而今次呢位老師都有份演出。咁會唔會同兒子同場表演？Margaret話：「其實可以，要等兒子沒那麼忙才行，我都可以做導師。」
楊嘉成（左起）、徐美琪及施榮恆同心推廣跳舞慈善籌款活動。
問到點解會搞呢個活動時，佢又話：「我之前都有贊助好多小朋友到黑池比賽，有人仲贏咗世界冠軍，想多啲人認識，而且今次係籌款活動，善款會捐畀東華三院。」東華主席施榮恆就透露當晚會參與演出，被問到係咪即場跳舞時，佢話：「我跳舞唔得，應該會唱歌，平時都鍾意唱吓卡拉OK。」
楊嘉成：一切隨緣
楊嘉成今年首年加入東華三院做總理，佢話早年曾學過Ballroom Dance，但並唔精，法律系出身嘅佢並無執業做律師，透露現時從事地產發展。年屆三十二歲，現在單身，靚仔又有型，可稱係城中「筍盤」，問佢有冇畀媽咪催婚？佢話仲未搵到女朋友，又否認自己要求高，話一切隨緣喎！
