政壇：搞搞政：話之DSD減辣掀炒風 葉國謙飛巴西睇波
尋日立法會開始審議俗稱樓市辣招嘅雙倍印花稅（DSD）條例草案，會計界梁繼昌提出「減辣」修訂，要求政府豁免自用工商舖徵交DSD，建議得到多個商界政黨同泛民主派兩大政黨支持而獲通過，令工商舖炒風重現。雖然政府已急急同各黨箍票，又要反對修正案嘅議員坐定定開會，但建仔嘅葉國謙就「話之你」，今晚照搭飛機去巴西準備現場睇世界盃決賽。
設計圖片及對白
建仔坐定定反對
立會調查「貪湯」前廉政專員湯顯明醜聞嘅專責委員會前日發表調查報告，五位泛民議員不滿由建制派主導嘅主體報告用詞過分溫和，決定另寫小眾報告，對貪湯予以「最強烈譴責」。
工黨何秀蘭更喊住批評專委會主席葉國謙，用多種手法阻撓泛民調查真相，有包庇貪湯之嫌，做法令人極度失望咁話。
葉國謙「包庇」貪湯後唔夠一日，就傳出梁繼昌嘅修正案唔夠反對票嘅消息。形勢咁緊張，本來話要「拉布」嘅人民力量都決定鬆手，話只係要見到創新及科技局流產，但會盡力確保DSD順利通過。據聞建仔喺下星期前往美國多個大城市會見當地華僑，但依家都考慮取消行程，乖乖哋坐喺度幫政府反對修正案。
雖然財經局同建制派呢頭喺度救亡，葉國謙嗰頭就決定如常去巴西睇波，月底先返港。被問到擔唔擔心離開香港會搞到政府唔夠票時，佢就好肯定咁話一定唔會有影響喎。如果最後梁繼昌嘅修正案因唔夠反對票而獲通過，搞到工商舖炒風重現，相信葉國謙將成為千古罪人。
