早前發生立法會主席曾鈺成唔認得商務及經濟發展局副局長梁敬國後，先發現一眾副局長同政治助理嘅知名度原來咁低，最弊係連成日交手嘅議員都唔識佢哋。正當一班副局政助不斷諗橋提高知名度時，尋日再受挫折，今次嘅主角係財爺鬍鬚曾嘅政助羅永聰，慘變「肥仔聰」、「羅家聰」。

羅永聰（左）知名度低，被卿姐改名做「肥仔聰」。

講極得個「聰」字啱

話說泛民主派尋日召開記者會時，議員劉慧卿話同財政司政助傾過財委會安排程序，但卿姐講極都講唔到羅永聰個名，然後就幫人改咗個花名叫「肥仔聰」。當卿姐不停「肥仔聰」前「肥仔聰」後，企喺卿姐後面嘅「阿毛」毛孟靜就忍唔住懶醒提水，點知連佢都講錯做「羅家聰」，真係錯到離行離列。好彩個名有個「聰」字，否則叫咗「羅家英」都有之。

最搞笑係阿毛講錯後，其他泛民議員都唔知發生乜事，要由記者提水先知，似乎班議員都要惡補下官員大名至得。其實羅永聰都唔算肥，但卿姐都用「肥仔」來形容佢，唔通卿姐見慣「瘦猛猛」嘅人，所以有少少肉地都叫肥？

第一手消息請下載on.cc東網iPhone/iPad/Android/Windows Phone Apps