呢排內地打貪風氣愈吹愈烈，風氣仲蔓延到香港，加上廉署有「貪湯」前廉政專員湯顯明呢啲佗衰家，搞到北角廉署總部外成日擠滿記者採訪。咁啱我哋尋日就見到工業總會前主席孫啟烈現身廉署總部，當堂打咗個突，心諗莫非連佢都要協助廉署調查？孫啟烈接受查詢時就大笑三聲，原來佢啱啱做咗廉署道德發展諮詢委員會主席，接替啱啱畀內地調查嘅前華潤董事長宋林個位，所以尋日去廉署係要開會。

孫啟烈做咗廉署道德發展諮詢委員會主席，尋日去廉署總部開會。

呢個委員會由一班商界代表組成，由於有外國商會代表，會議一向用全英語進行，但尋日就有啲唔同，雖然會議都係以英語進行，但就特別加設即時傳譯員，仲講明係英文翻譯國語，即係話有委員係唔識聽英文囉！咁啱我哋翻查資料，尋日有位以「香港中國企業協會總裁」身份開會嘅馮洪章首次出席會議，咁大家明白乜嘢事啦！

第一手消息請下載on.cc東網iPhone/iPad/Android/Windows Phone Apps