政壇：張仁良挖走呂大樂 幫教院正名省招牌
香港教育學院申請正名咁多年，依家聲稱已上咗直路，成功關鍵之一在於教院能否發展多元學科。教院最近成功向香港大學「挖角」，港大社會學系系主任呂大樂將於下月一日出任教院香港社會研究講座教授，據聞呂大樂今次加入教院，係校長張仁良誠意力邀佢過檔，希望日後主攻社會科學研究，加強非教育學科嘅發展。
呂大樂
呂大樂早年曾教過香港城市理工學院同香港中文大學，曾出版多本與社會現象、研究社會運動嘅書籍，佢又不時發表對於香港時事嘅睇法。教院尋日宣布呂大樂就嚟過檔，成為教院講座教授，據了解，呂大樂除咗會負責社會科學研究之外，亦可能會客串教吓通識，希望可以加強社會科學嘅團隊，為正名鋪路。
