政壇：以射導彈「打沉」商經局

話說立法會工商事務委員會早前有九位議員報名，決定喺八月組團出訪以色列，考察吓當地工業發展，因為以色列以高科技同軍事工業發達見稱，咁啱政府又要搞創新及科技局，所以先有呢次外訪。早前我哋講過，呢次外訪團為咗減少開支，已經將行程縮減到六日，諗住減少外界批評。

點知人算不如天算，呢次以色列之旅最終都係壽終正寢。因為以巴局勢突然升溫，爆發暴力衝突，加沙地帶甚至乎導彈橫飛，港府七月八號向以色列發出黃色旅遊警示，一眾身嬌肉貴嘅議員怕冇保險，泛民建制罕有達成共識，拿拿臨取消以色列之旅，估唔到泛民建制能夠破冰，全靠幾支導彈，你話係咪好諷刺？

不過，另外有一個講法，就係泛民議員都唔想去呢次以色列之行，因為八月中有可能提前佔領中環（佔中），如果被人知道佢哋去咗以色列考察而唔去佔中，一定腹背受敵。團友之一嘅法律界郭榮鏗就否認呢個講法，又話議員安全重於一切，如果一日有黃色警示，都唔應該出發喎。

嘥埋以色列政府工夫

班議員一聲話取消以色列訪問團就簡單，但據聞打爛咗商務及經濟發展局個如意算盤，事關當局一心諗住靠呢個團幫準備成立嘅創新及科技局省招牌。哦！咁商經局局長蘇錦樑惟有自嘆黑仔喇！據聞以色列政府方面都為今次考察做咗唔少工夫，依家話取消就取消，真係白嘥工夫咯。