擦鞋爛騷真骨痹 消防肉麻當有趣

呢嗱 ，消防處處長陳楚鑫提早退休，消防處為呢個任內屢爆醜聞、沒有最瘀只有更瘀嘅庸官大搞「退休騷」。尋日嘅「歡送大龍鳳」喺沙田消防局開騷，話明擦鞋，梗係要落足本錢喇，除咗學員步操，仲有模擬爆炸救火等表演。「演員」個個身水身汗，高官就笑到見牙唔見眼，尤其係陳楚鑫，着住成套禮服，直頭威過威士忌。

係呢，尋日朝早唔係有雷暴警告咩，唔通冒雨表演？冇錯嘞，消防官僚為咗攞彩，根本唔理消防員安全。正如有消防員投訴，處方為擦新舊處長鞋，不惜違反安全條例，要學員喺雷暴警告下冒雨做騷，唔嬲就假。即係咁，消防官僚當安全冇到，萬一出事，消防員能救不自救，咁就醜怪咯！

消防員變「落湯雞」不特止，連「知客」、「阿四」、泊車仔都做埋，先至難頂吖，唔怪得媽聲四起喇。呢，消防處為咗接待貴賓，將小瀝源消防局變做臨時停車場，消防員有人做指揮，有人擔遮擋雨，有人代客泊車，真係各有各精彩。

消防處長退休啫，擦鞋騷場面幾乎墟冚過殖民地時期送港督返祖家，有冇誇張啲吖。講開又講，五個紀律部隊中，警隊、懲教署、入境處、海關從來唔搞呢一套，只有消防處樂此不疲，次次都做場大龍鳳，而且愈來愈肉麻骨痹，唔通佢哋有特權？或者高人一等？

上任處長盧振雄嘅「榮休騷」已經畀人鬧爆，家陣陳楚鑫執包袱，處方依然照辦煮碗，而且做得更肉麻更核突。早前本報踢爆，消防官僚為擦上司鞋，除咗動用大量消防員連日綵排所謂「救人救火演習」，仲霸佔五部全新消防車做布景板，調派較舊嘅老爺消防車出勤。

擦鞋文化「薪火相傳」，唔怪得消防處近年屢爆醜聞，形象貼地喇。審計署舊年力數消防處十宗罪，包括延誤處理投訴、做「大花筒」、幾億元公帑引入嘅第三代調派系統周時「跪低」，嚴重影響救援進度等。陳楚鑫同樣被指犯咗「十宗罪」，簡直係醜聞纏身，醜態百出。

開講有話，無功不受祿，消防處管理混亂，烏煙瘴氣，皆因處長無德無能，尸位素餐。陳楚鑫令消防處形象插水，應該早走早着喇，仲好意思接受「歡送」，簡直唔知醜字點寫。計太一叮話齋，對呢啲面皮厚過電話簿嘅庸官，最好學古人送瘟神咁，紙船明燭侍候，叮！