潮語「懶人包」唔係真係一個食得嘅包，亦都唔係女士們最鍾愛嘅「包包」。「懶人包」其實係指每當有啲社會事件發生，有網民會將事件嘅來龍去脈，用簡單文件寫成撮要，指出重點，並加上圖解，令更多平時唔太關心時事嘅「懶人」一睇就明，並且喺網上轉發。呢啲網上發表嘅「社會事件精要」就叫做「懶人包」。

香港東北發展搞到滿城風雨，本來香港土地短缺，發展新市鎮係其中一個解決香港房屋問題嘅辦法。政府要徵收土地發展，亦都係無可避免。徵地嘅過程，肯定會同當地嘅居民有所衝突。但係，發展新市鎮嘅同時，必須要合乎程序，顧全社會公義，令受影響嘅人得到公平嘅賠償同照顧。就以東北事件為例，有建制派立法會議員竟然罔顧會議程序，單方面剪布，企圖令財委會不能就東北發展前期撥款進行討論，激發立會門外示威者衝擊立法會，造成混亂。期間，更懷疑有警務人員混入人群做臥底！到底點解香港會搞成咁？你估真係全係示威者嘅錯？如果香港嘅管治真係好，國泰民安，你估又有無人特登去示威且衝擊？難為有啲無知港豬，連東北計劃係乜都唔知，單純相信CCTVB新聞畫面，就指摘示威者行動係暴力。唔識唔知唔緊要，睇睇「懶人包」就知，東北發展葫蘆裏面賣咩藥啦！得百分之六土地係用嚟起公營房屋咋！發展最後益邊個？咪又係喺新界東北囤地多年嘅大地產商！

「××包」本身其實係一啲網上電腦遊戲嘅術語，係指一啲贈送或賣畀玩家嘅「package」，台灣就譯做「包」。所以「懶人包」係台灣早前「反服貿」運動出現，而令香港人所熟悉。後來香港嘅東北事件，網民亦都製作咗東北「懶人包」，令更多香港人明白政府所謂東北發展，係乜嘢一回事。不過最搞笑嘅係特區政府發展局，竟然透過facebook發表「常人包」，反擊「懶人包」嘅論點！其實作為政府機構，唔去正正經經面對公眾，回應事件，反而做埋呢啲無聊嘢，可見政府嘅「膠」度有幾高。

面對今時今日咁嘅局面，香港受到中央前所未有嘅干預，一國兩制備受考驗，香港人真係唔可以再「懶」。只有挺身行動表態，先可以力保香港嘅自由同法治。應該點做？你明嘅！唔使「懶人包」都知啦！

第一手消息請下載on.cc東網iPhone/iPad/Android/Windows Phone Apps