政壇：星爺主持財會甩轆畀卿姐暗寸冇料到

立法會財務委員會討論新界東北發展區前期工程撥款爭議沒完沒了，似足一○年高鐵撥款「翻版」，財委會主席吳亮星嘅表現，仲惹嚟好多批評，立法會議員劉慧卿尋日喺網台重提當年做財委會主席，審議高鐵撥款，雖然都做咗泛民同建制兩大陣營磨心，不過會議都有效進行，暗寸吳亮星主持會議冇料到！

設計圖片及對白

重提當年高鐵撥款

卿姐尋日個節目係討論立法會處理新界東北項目爭議，講起星爺想強硬「剪布」中止辯論，卿姐就重提當年同時任運輸及房屋局局長鄭汝樺有商有量，開足十四節會議畀議員問到夠，先至表決通過撥款申請，擺明暗寸星爺同政府、議員冇做好溝通，落得今日如斯田地。

話時話，當年高鐵撥款一役，官員同議員要漏夜由幾百名警員築成人鏈護送下先至成功逃出立法會，仲要坐最後一班港鐵走。所以話呢，如果官員同受影響嘅市民溝通得唔好，無論官員同議員喺議會內溝通得幾好都冇用。