政壇：盛智文或面臨「雙失」
做咗海洋公園董事局主席足足十一年嘅盛智文終於卸任，據聞政府仲有意為西九管理局搞大換班，全部超過十名做夠六年嘅董事通通冇得留低，如果係真，盛智文就可能面臨「雙失」，不過，海洋公園宣布咗，考慮請盛智文做榮譽顧問，參與佢喺任內跟開嘅大樹灣水上樂園發展項目督導小組工作。
盛智文
西九管理局董事會依家有十五名非官方董事，大部分去到今年十月就做夠六年，根據政府委任公職人士嘅「六六規定」，理應全部卸任換人，只剩低孔令成、蔡永忠同葉傲冬呢幾位較新委任嘅董事。早前有傳為免一次過換太多人，影響西九工作嘅延續性，專責西九財務嘅夏佳理、專責選購藝術品嘅羅仲榮、同埋被指係隔代西九主席嘅盛智文，將會獲破例留任多一至兩年。不過，近日又有消息指，政府內部突然決定為西九進行大換班，連盛智文等人都冇得留低，背後原因就眾說紛紜。
其中一項係傳夏佳理、羅仲榮同盛智文都係「唐營」人士喎，但新政府上場後，獲委任或續任重要公職嘅「唐營」人士，可能仲多過「梁粉」，呢個說法嘅真確性令人存疑。
另外，海洋公園人事布局方面，政府會請孔令成坐正主席，同時又委任現任海洋公園董事劉鳴煒做副主席，信和置業執行董事黃永光同康泰旅行社董事總經理黃進達就做新董事。
