政壇：工總開大會 請實Q頭痕
本港示威活動愈嚟愈激，下個月工總將喺灣仔會展舉行周年會員大會，據聞，會展方面唔敢掉以輕心，要求工總增聘保安嚴防騷亂，結果搞到負責籌備嘅工總行政總裁蘇家碧好頭痕。
蘇家碧（右）講起籌備工總周年會員大會就好頭痕。左為提升快樂指數基金義務總幹事陳詠梅。
劉燊濤為睇波，甘願晚晚做「廳長」。
今個月初，香港總商會喺會展舉行換屆周年大會時，聽講遇到勞工團體示威，或者係咁，會展方面有呢個要求。工總副主席鄭文聰話，主席劉展灝（Stanley）係勞工顧問委員會成員，成日公開發表意見，佢都驚勞工界誤解，到時會去踩場。話時話，近日謠傳有護衞公司以時薪一百二十元至二百多元急搵保安員去立法會執勤，雖然最終證實係流料，但都反映保安業需求大增，唔知到時工總夠唔夠人手應付呢？
Stanley嘅囝囝劉燊濤（Gary）就講波，最近世界盃賽事踢到如火如荼，身為超級足球迷嘅Gary自然忙到日夜顛倒。佢笑住咁話，晚晚校定鬧鐘凌晨三點鐘起身睇波，為免嘈醒太太，佢甘願晚晚做「廳長」喎。
