政壇：阿松倡同大陸借孤島 起新市鎮焚化爐
香港地少人多，依家政府搵地都成日遇到波折，前財政司司長梁錦松尋日就拋出新橋，佢出席一個研究會嗰時，就大講自己嘅搵地新思維，佢話，香港土地不足，如果夾硬改變土地用途，或者開發郊野公園土地，都好難做到，所以最好係同內地合作，譬如開發珠海嘅土地或內地孤島畀港人用，佢仲認為，呢啲地方可以用嚟起新市鎮或者焚化爐等設施，咁樣，港府都可以少啲煩惱喎。
梁錦松建議開發珠海土地或內地孤島供港人使用，確係新思維。
阿松仲叫港府同港人睇遠啲，港人唔應該淨係諗喺香港工作，而要放眼世界，積極面對全球化趨勢。阿松話，喺國家開放時，港人提出本土化就最弊，因為本土化完全冇道理，又話如果香港固步自封，上層冇得創業，下層又點會有工開吖。至於講起中港矛盾問題，阿松就爆咗一句話：「港英時代冇咩好，青年人唔知道，但我知道」，莫非阿松知道港英政府有好多唔好嘅嘢？
