政壇：議員訪以想縮沙

蔣麗芸寧去北歐

工商事務委員會原本計劃去以色列睇吓當地創新科技發展嘅經驗，仲傾定暑假休會嗰陣出發，立法會內務委員會原本尋日傾以色列訪問，但就因為唔夠時間而要押後到下星期先再傾喇。

不過，行程仲未敲定，計劃已經有啲變化，我哋聽聞近日幾位建制派議員就想打退堂鼓，除咗一早表明唔參加嘅委員會主席方剛外，副主席蔣麗芸（Ann）都因為想跟另一個代表團去北歐而縮沙。聞說阿Ann對議會聯絡小組搞嘅暑假北歐外訪團比較有興趣，如果去完以色列再去北歐，好似舟車勞頓頻撲得滯，所以惟有作出取捨。

我哋之前都問過阿Ann，佢話應該唔去以色列，但就有意叫埋老公梁海明齊齊去北歐，想喺外訪前後玩幾日，佢最多放棄立法會資助嘅外訪費用，自己畀錢公幹咁話。本來議員鍾樹根同葛珮帆（EQ）會代阿Ann出征以色列，但樹根就話八月要去澳洲開會分唔到身。而EQ亦都心大心細，皆因佢老公驚以色列因為中東局勢緊張而有危險，認為做議員唔使搵命博咁話，所以佢都仲要諗下先喎。