全英公敵蘇亞雷斯反擊 你哋都笑得我多
「全英公敵」蘇亞雷斯冇得留低！昨晨上演的世盃D組大戰，烏拉圭憑蘇亞雷斯梅開二度以2:1擊敗英格蘭，令分組賽兩戰全敗的「三獅兵團」在意大利倒灶負哥斯達黎加後宣布提早出局。贏波功臣「哨牙蘇」慘成「出氣袋」，遭英國國會議員及政客遷怒，効力英超球會利物浦的他則以「你哋都笑得我多喇！」還擊，難怪博彩公司馬上將這位「紅軍」射手的離隊賠率升溫。
英格蘭（右）不敵烏拉圭，首次於決賽周首兩場全敗。（Getty Images圖片）
蘇亞雷斯一頭一腳痛擊「三獅兵」，終於吐一口烏氣。（美聯社圖片）
蘇亞雷斯（右）頭槌建功頂死赫特，為烏拉圭先開紀錄。（美聯社圖片）
蘇亞雷斯此前曾因「插水」、種族歧視及「咬人」等醜聞淪為英國「過街老鼠」，不過上季他憑出色表現「洗底」，橫掃英格蘭球員先生及足球先生兩大殊榮。奈何昨仗「哨牙蘇」以兩個入球痛擊英格蘭，令「三獅兵」史上首次在世盃首兩場賽事遭逢連敗提早出局，嚴重打擊英國經濟。有英國博彩公司估計，英國每10名僱員中，就有1名會以國家隊輸波為理由請假，亦有新聞網站指出，英國最大酒吧營運商Punch Taverns股價一度跌至9.5鎊，其後才回升至開盤價。
難返英超搵食傳巴塞6.9億斟介
英國人藉「三獅兵」的世盃失利遷怒於蘇亞雷斯身上，工黨國會議員區義安在twitter怒斥該名烏拉圭國腳是「骯髒、暴力的騙子和種族主義者」，而活躍於政壇的前熱刺班主休格亦暗示「唔歡迎阿蘇返英格蘭」。
激起民憤的「哨牙蘇」賽後更發表「寸爆」言論還擊：「賽前好多人取笑我呢幾年喺英國發生嘅事，我好想知佢哋依家點諗？今日對我嚟講好美妙，我經常發夢都諗過有呢一日！」蘇亞雷斯成為「全英公敵」，有傳皇馬及巴塞均對他極有興趣，有指巴塞出價5,200萬鎊（約6.9億港元）斟介，英國博彩公司亦將他在英超開鑼前離隊的賠率由2.75倍調低至2.5倍，投皇馬亦由3.2倍升溫至2.75倍。
