日本腦炎殺埋身 滅蚊除患須認真
日本腦炎又殺到！本港日前確診今年首宗本地感染日本腦炎個案，中招嘅係一位廿六歲女子，住天水圍天恒邨，目前情況穩定，不過咁，日本腦炎由蚊傳播，嚴重者可致腦神經破損甚至喪命，唔係講玩o架。
咁啱得咁蹺，舊年兩宗本地感染日本腦炎個案，患者同樣來自天水圍，悲情城市果然夠晒悲情。衞生防護中心係咁講嘅，天水圍近年多次出現日本腦炎個案，相信同區內有豬場及野鳥聚集有關，加上鄉郊有積水，形成病毒嘅傳播鏈，當局近排已加強滅蚊喎。
嗱，如果當局真係喺天水圍加強滅蚊，就唔會年年都有人中招喇。食環署尋日係威係勢出動多名全副武裝嘅滅蚊隊人員到場補鑊，渠務署亦派員清理附近明渠嘅淤水同垃圾，夠晒大陣仗。其實，呢次滅蚊行動如果早啲做，效果完全唔同，當局賊過興兵，遲唔遲啲吖。
正如區議員踢爆，天恒邨鄰近濕地公園，一直受蚊患困擾，街坊成日投訴好多蚊，草叢多積水，連走廊都有蚊，小朋友咬到成手都係。其實，天水圍蚊患嚴重嘅原因好簡單，就係清潔工人嚴重不足。就以天恒邨為例，兩萬幾居民，只得三十幾個清潔工，又要倒垃圾，又要掃地，仲要噴蚊油、清理積水，根本應付唔到。區議員多次要求房屋署增加人手，可惜署方闊佬懶理，聲稱合約所限，唔可以要求外判商增聘人手喎。
咁都得？一句合約所限就唔理居民健康，仲有冇離譜啲吖。本港七成半日本腦炎患者住喺豬場二至三公里範圍內，尤其天水圍除咗鄰近豬場，而且常見野鳥，簡直係日本腦炎高發區，近幾年接連爆發感染個案，當局仲墨守成規，講得好聽叫唔識轉膊，講得難聽根本係不負責任。
係人都知，只有搞好環境衞生，清垃圾，掃淤水，至可以消除蚊患，防止日本腦炎，港產官僚明知清潔工唔夠人手都關人個關，直頭係靠害喇。舊年天水圍爆發日本腦炎時，有立法會議員狠批政府部門各自為政，未有針對蚊患制訂全面應變方案，蚊都識轉彎，衞生部門反而唔識。估唔到事隔一年，港產官僚依然冇改進，繼續得過且過混日子，實在匪夷所思。
講開又講，港府防疫一向後知後覺，就算疫症臨門一樣慢條斯理，當年沙士係咁，禽流感亦係咁，依家日本腦炎重臨，當局又知唔知驚呢？咪話太一叮唔提醒，如果唔切實根除蚊患，一旦日本腦炎成為風土病，呢隻鑊港產官僚孭硬o架，叮！
