城中鏡：英倫銀行一哥 人工勝聯儲局主席

其實卡尼掌舵英倫銀行八個月嘅底薪夾埋得三十二萬鎊，凸咗嗰二十六萬幾鎊係房屋津貼，事關倫敦嘅物價比起佢之前做加拿大央行行長期間定居嘅渥太華，唔知高幾多倍，卡尼臨過英國前幾個月，形容過倫敦係物價最貴嘅首都，英國財相歐思邦要撬人，點可以唔加多啲獎賞呀。

況且，卡尼嘅二十六萬幾鎊房屋津貼冇幾多真係落咗袋，因為三分之二拎咗去孝敬包租公，可想而知倫敦樓價貴得幾誇張，難怪佢要爆響口想提早加息啦。

之但係更牽動英國納稅人情緒嘅，或者係英倫銀行公布，舊年佢哋資助咗卡尼一家六口十萬幾鎊搬去倫敦，其中包括埋機票、搬屋、臨時住宿，仲幫佢四位千金撲埋學校添。