城中鏡：徐濠縈赴內蒙長跑行善
自從愛上馬拉松運動後，被冠以「肯雅徐」花名嘅潮人徐濠縈，稍後會遠赴內蒙古草原跑馬拉松，為中國內地貧困地區患唇齶裂嘅兒童同年輕人，籌募做修復手術嘅醫療經費，希望提高各界對唇齶裂患者嘅關注同支持。主辦嘅機構仲好感謝佢願意身體力行Run For Smile跑出微笑，為更多唇齶裂患兒爭取可改變一生嘅手術機會。
徐濠縈（後排右三）希望令嗰啲較不幸嘅兒童及年輕人，重展自信燦爛嘅笑顏。
徐濠縈話喺一次練跑後，想要將跑馬拉松嘅滿足感，轉化成更多嘅正能量同祝福。所以，主辦機構邀請佢參加呢次馬拉松籌款活動，雖然要長途跋涉去內蒙古比賽，佢仍義不容辭一口應承。佢話：「幾年前搞過一次小規模活動，幫微笑行動中國基金籌款，好認同佢哋喺唇齶裂方面嘅工作，呢次獲邀參加嘅活動規模較大，希望藉呢個機會喚起更多人嘅關注同支持，令嗰啲較不幸嘅兒童同年輕人得到免費手術同復康照料，重展自信燦爛嘅笑顏。」
