城中鏡：梁卓偉快閃買衫送契仔
先後做過食物及衞生局副局長同特首辦主任嘅Gabriel梁卓偉，舊年八月成為香港大學醫學院近百年來最年輕嘅院長後，大家都對年紀輕輕就涉足官場嘅佢寄予厚望，工作忙碌自然係意料中事，但估唔到佢連購物都匆忙過其他人。有日晏晝四點幾鐘，Gabriel難得忙裏偷閒，現身中環太子大廈三樓一間嬰兒服裝店，好快手就買到嘢，然後急急腳趕住離開。
梁卓偉好快就揀好送畀契仔嘅BB衫生日禮物，到櫃位碌卡畀錢。
一買完嘢離開店舖就邊行邊回覆短訊，非常忙碌。
怕影響工作棄睇世盃
記者上前睇吓Gabriel買乜嘢喇？原來佢係買BB衫。Gabriel話有個契仔就嚟生日，家陣未夠一歲，所以就諗住買份生日禮物送畀契仔喎！佢一向對衣着打扮都好有要求，揀衫當然難唔到佢喇！見佢前後揀咗約十五分鐘，就睇中咗一件嬰兒恤衫同一條褲仔，然後直接行埋櫃位碌卡畀錢。不過，唔知佢係咪仲有工作响身，見佢冇即刻拎走啲BB衫，等職員包裝好就暫時寄存喺店內。
Gabriel離開嗰陣，邊行路邊耷低頭覆短訊，睇嚟院長嘅工作真係忙到冇時停。咁忙咪連世界盃都睇唔到囉？佢就透露，其實好想睇，但因為場場波都喺深夜踢，佢真係冇辦法，如果休息唔夠又會影響工作，所以惟有放棄喇！咁有冇心水睇好邊個國家隊？佢好實際話以往都會睇往績來決定，但今年就真係唔得閒研究嘞！
