「養過咁多隻雀，ＢＢ係最特別，點都取代唔到喇！」七十一歲的李伯早前走失了一隻相伴逾五年多的了哥「ＢＢ」，觸動全城尋雀，可惜一一撲空。原來李伯本身是愛雀之人，與雀鳥素有緣分，近日他決定收養新寵，新了哥不會說話，也不會逛街，只會「氹氹飛」、「呀呀叫」，縱然新不如舊，但至少令孑然一身的李伯有伴相隨，不再孤單寂寞。

雖然「ＢＢ」一去不返，但有新了哥相伴，李伯已經心滿意足。

昔日李伯與「ＢＢ」一起逛街的片段，令人懷念。

現在李伯又可以帶雀出街，再譜人雀情緣。

一眾街坊比李伯還要興奮，紛紛走上前跟李伯寒暄一番。

李伯一開門，隨即傳來響亮的呀呀聲，一襲黑衣的了哥在家裏飛來飛去。牠每轉數圈就停低，站在高高的紙皮箱上，雙腳緊抓着箱邊，昂頭俯瞰，一臉霸氣。「呢隻係乸嚟，比BB後生好多，好鍾意四圍飛，成間屋咁大，佢淨係鍾意企喺嗰個位。」與新了哥相處近一星期，李伯已開始熟悉牠的脾性。

他拿起一袋從雀仔街買回來的飼料，倒進鳥籠裏的小盆，新了哥急不及待地啄呀啄，食呀食，食完又叫幾聲，「呢隻唔識講嘢，只係識得叫，出街一定要放番入籠，唔係佢實飛走，梗係冇BB咁精靈啦！」言談之間，李伯仍然對「BB」念念不忘。

過去五年多，由友人贈送的「BB」一直與李伯相依為命，「BB」極具靈性，不但會說「各位，早晨」，還猶如小狗般跟出跟入，不需鳥籠，令人嘖嘖稱奇，「過馬路見到紅燈佢識得停低，去餐廳食飯佢就企喺門口等，總之我去邊佢就跟到邊。」

李伯與「BB」的故事，在屯門山景邨幾乎家喻戶曉，「個個街坊都好鍾意BB，成日同佢玩，BB個名都係班街坊改嘅。」但兩個月前，「BB」與李伯外出時被路人嚇走，自此一去不返，「搵咗好耐都搵唔番，傷心都冇用。」期間，李伯接獲不少熱心市民尋獲「BB」的消息，但每次都食白果，「我一睇就知唔係BB。」

雀鳥成最佳伴侶

直至本月初，一名市民家中有隻自來了哥，李伯前往了解，雖然證實並非「BB」，但他最終決定收養這隻女版「BB」，再譜人雀情緣。新了哥至今仍未改名，記者提議叫「B女」，李伯卻皺皺眉，「B字太男仔啦，想改個女仔啲，到依家都未諗好。」

獨居多年的李伯，養過不少雀鳥，是愛雀之人，坦言與雀鳥有種說不出的緣分，「我好少買雀，一係人哋送，一係自來雀，唔知點解啲雀好跟我，養雀幾乎都唔使用鳥籠。」不過，他每次養雀時間都不長，「最長嗰隻已經係BB，養足五年，好有感情。」

有次，他帶雀到附近公園散步，豈料途中被流浪貓叼走，「原來嗰個公園好多貓，以後都唔會再去。」又有一次，他任職大廈看更時，不小心「坐死咗隻雀」，「嗰時養隻高髻冠，有日我當更行開咗，點知隻雀坐咗喺我個看更位度睇電視，我返到嚟又唔知，一坐就坐咗落去，屁股覺得熱熱哋，點知……」

近年身體逐漸轉差，李伯已退休，更因血壓高而影響行動，不能長時間站立，雀鳥成為他最佳伴侶，「有隻雀陪吓自己，梗係冇咁悶啦！」李伯踏出家門，一手拿着拐杖，一手提着鳥籠，拐杖的篤篤聲，與籠裏了哥的呀呀叫互相呼應，老人與雀的故事又得以延續下去。

第一手消息請下載on.cc東網iPhone/iPad/Android/Windows Phone Apps