兩個星期前，已有消息話香港貿發局的總裁林天福會被委任到機管局做新行政總裁，本想寫篇評論的，但香港局勢之混亂，真係日日「鬧唔切」矣！

點知，尋日睇新聞，機管局真係高薪招聘咗林天福過檔，年薪仲近千萬添！佢值咩？據人工無佢咁多，但卻有權決定請佢嘅「老頂」（即機管局短命主席）羅康瑞話林先生係「從一百人中挑選」出來的，咁！我真係好想知嗰批落選者係邊九十九個囉！

林天福毫無「航運經驗」（或稱為「零經驗」），竟高薪厚職叫佢「現叉廚」成個機管局？林先生自我解答話，佢過去十多年來東奔西跑，深切體會到機場對經濟發展的重要喎！

吓！咁就砌低九十幾人？嗰個喺超記滷味茶餐廳送外賣嘅崩牙九夠日日東奔西跑喇！咁就畀佢做交通部長？而喺IFC洗廁所嘅周大嬸咪可以做衞生署署長？乜嘢邏輯嚟o架？

現機管局正推動緊第三條跑道，同埋發展機場北部商業用地，起用林先生這等質素人才，實叫人擔憂，因林先生多年前升任貿發局總裁第一天見記者時，直言話「香港書展」無錢賺，所以佢唔想辦落去喎！真有病！一個成功嘅書展，不特止體現一個地區嘅文化氣息，仲係有錢都買唔到嘅靚仔形象。另書展入場人數近一百萬，平均入場數十五元計，加上攤位租金，幾千萬生意都無錢賺，咁小貓三四隻嘅婚紗展仲做嚟托咩！

吓吓講錢咁市儈，機場跑道牽涉的錢項億億聲，我先在此請老廉同審計署唔該幫手（目及）實呢條友，咪再多件前政務司出現呀！驚驚！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps