話說立法會財務委員會聽日先開會，繼續審議新界東北發展前期研究撥款申請，正當泛民主派考慮緊會唔會加入戰團幫手「拉布」之際，人民力量議員「大舊」陳偉業同「慢必」陳志全就率先決定將行動升級，响尋日嘅立法會大會上向政府同建制派全面開戰，瘋狂連環要求響鐘點算法定人數超過二十次，佢哋連響鐘都有特別策略，就係趁班議員出去食飯嗰時要求點人數，甚至乎等啲議員入去湊夠人數後行番出會議廳嗰刻，又再要求點人數，搞到班建制派議員要行出行入，有氣冇碇抖。
慢必投訴新界東北發展爭議性大，民意反彈仲大，但政府仍然霸王硬上弓，仲同財委會主席「星爺」吳亮星夾計快快手「剪布」，罔顧新界東北居民利益。大舊仲講明，話喺呢個幾月內唔會畀建制派好過，誓要將佢哋玩殘為止。
有建制派議員批評兩人不斷響鐘係要不得同無聊嘅行為，又批評兩人嘅講法係垃圾，如果因為佢哋點人數搞到不幸流會，人力要負上最大責任喎！
高永文唔敢去醫肚
其實班高官都唔好受，喺度等了又等。據聞食衞局局長高永文坐喺會議廳前廳，由一點等到三點鐘，又因為唔知幾時先輪到佢，搞到唔敢去食飯，最後等到三點半鐘答完問題先急急腳去醫肚。商經局局長蘇錦樑原先諗住答完問題至去灣仔會展出席活動，點知最後去埋活動後仲有時間返立法會坐鎮，睇嚟一班局長尋日真係多得人力唔少囉。
第一手消息請下載on.cc東網
