鍾國斌率先帶十幾個廠家去緬甸買地開廠。（資料圖片）
越南早前爆發反華示威，唔少中國以至香港廠商都受牽連，工廠都要停工，部分廠商就決定「另起爐灶」。一向關注緬甸發展嘅立法會紡織及製衣界議員Felix鍾國斌，上星期就率先帶十幾個廠家去緬甸簽買地合約，連緬甸華人首富潘繼澤（Serge Pun）同香港駐新加坡經濟貿易辦事處處長方毅都現身見證簽約儀式。
Felix話呢幅响仰光嘅地，足足有四十萬平方米大，地價盛惠三千萬美元，最快今年底交吉，再多半年就起晒廠房投產。佢透露，最少有三個香港廠家本來想去越南發展，依家都改去緬甸開廠，而且緬甸人工仲平越南三分之一，實在好吸引。佢哋仲買咗另外一幅有一百二十萬平方米地，Felix會有份喺度開廠，唔少國際品牌已經搵佢介紹廠家。
至於Felix一直關心嘅緬甸傭工，似乎就無疾而終嘞，皆因首批近二十名緬傭，似乎唔係好習慣香港嘅城市生活，而好多香港中介公司好「狼胎」收成二萬六千港元中介費，比菲律賓同印尼多一倍，加上有印傭Erwiana被虐事件，緬甸勞工部決定謀定而後動，做好配套先放人去香港打工。
第一手消息請下載on.cc東網
