政壇：象哥睇波唔成嘈醒老婆

象哥話佢對西班牙隊情有獨鍾，咁啱上周六凌晨有場比賽就係西班牙對荷蘭，象哥梗係非常興奮啦，仲決定校定鬧鐘三點鐘起身睇波。不過，當鬧鐘準時三點響起，佢竟然繼續呼呼大睡，但佢嘅枕邊人林淑儀就畀個鬧鐘嘈醒咗。就算老婆起咗身，但象哥仲係不敵睡魔嘅召喚唔肯起身睇波，最後當然係一分鐘賽事都冇睇過。

郭偉強睇波有妙策

荷蘭最後以五比一大炒西班牙，作為荷蘭擁躉嘅工聯會郭偉強梗係開心到見牙唔見眼啦。佢話覺得荷蘭隊大勝係一個好兆頭，又話如果球員冇傷患困擾，分分鐘會捧走世界盃喎。講到凌晨睇波有咩策略，郭偉強透露自己每日只會睇一場賽事，一係就睇凌晨十二點嗰場，一係就晨早起身睇六點鐘嗰場波。

不過，咪睇郭偉強好似好有策略咁，佢話前日原本諗住睇比利時對阿爾及利亞場波，但睇咗半場就頂唔順瞓着咗，所以捱夜睇波都咪話唔辛苦。唔少人睇波都會買埋一份，但郭偉強話唔鍾意賭，一蚊波都未買過，不知幾健康咁話喎。

議員陳恒鑌都係荷蘭隊嘅支持者，佢話支持荷蘭隊係因為有個情意結，就係好鍾意荷蘭隊前隊長柏金，皆因柏金每次出國踢波都寧願搭船唔肯坐飛機，覺得佢好有性格，所以自此之後都視對方為偶像咁話。