說是蝗蟲全球搶 為淵驅魚為哪般

嗱，新西蘭政府率先宣布，為配合中國五一黃金周，特別將原本最多一年嘅中國旅客多次往返簽證延長至兩年。美國亦唔執輸，考慮畀第二次入境嘅中國旅客免簽證。而歐洲國家亦紛紛縮短中國旅客申請簽證嘅時間，其中法國將簽證時間由十個工作天減至不足四十八小時，誠意十足o架。總之，為求中國財神爺到訪，各國出盡法寶。

梗係啦，中國經濟強勢崛起，已超越德國同美國成為全球最大旅遊消費國。單係去年，中國已有九千八百萬人次出境旅遊，當中近三百五十萬去歐洲，比前年增加一成一，預計五年後，中國旅遊市場消費將達到二兆美元，都咪話唔誇張。有錢能使鬼推磨，歐美爭迎中國客，一啲都唔出奇。

本來呢，香港佔盡天時地利，係內地旅客出遊首選之地。可惜吖，近年中港矛盾不斷激化，幾乎去到水火不容嘅地步，好似最近嘅內地童隨處便溺事件咁吖，本來小事一樁，結果搞到滿城風雨，唔止兩地居民展開罵戰，連官方傳媒亦加入戰團，有內地網民仲發起六月一日後罷遊香港添。

即係咁，由於內地長期欠缺公德教育，部分內地客行為粗鄙，唔守規矩，確係令人側目，當局該執法就執法，而唔係冇原則嘅「包容」。不過部分港人表現偏激，上綱上線，一竹篙打晒一船人，其實亦有欠公道。話晒過門都係客，遇到不文明旅客，我哋更應該展示文明質素，唔好畀人笑話係五十步笑百步。

點講都好，旅遊業係本港經濟支柱之一，好多市民靠佢食飯，香港究竟耳根清淨重要，抑或發展經濟改善民生重要，大家真係要好好諗一諗。內地客不文明行為唔係香港獨有，點解人哋唔會反應過度，唔會閉關鎖國，反而熱情向中國旅客招手，唔通人哋都係金錢嘅奴隸，全世界只有香港人最清高？

中港矛盾一發不可收拾，雙方都有責任，港府不作為更係罪魁禍首。旅遊設施十年如一日，接待能力完全跟唔上旅客增長，唔亂至奇。嗱，現屆政府話要發展大嶼山，打造成新商業橋頭堡疏導旅客，咁就唔好得個講字，坐言起行嘞唔該，叮！