城中鏡：楊章桂芝呻遊菲團淡靜
菲律賓人質事件上禮拜終獲解決，制裁菲律賓嘅黑色旅遊警示亦隨之解除，但新華旅遊董事總經理兼香港專業及資深行政人員協會理事Cindy楊章桂芝話，菲律賓整體治安情況仍備受關注，港人戒心未減，暫時未見報團人數回升。Cindy分析話，人質事件發生後，唔少港人質疑菲國係咪有能力維持治安，並指寧願去東南亞其他國家。
剛歐遊回港嘅楊章桂芝（右）指今年旅遊業界面對唔少挑戰，旁邊為美隆堡酒業執董麥鳳儀。
即使撇除個別事件，旅遊界今年其實都挑戰多多，當中離唔開同全球經濟大環境有關。Cindy話剛過去嘅復活節，到歐洲旅遊嘅人數比去年少咗好多，唔少外籍司機慨嘆中國旅客銳減，貼士都收少啲。咁都未算，最頭痛係請人難，佢透露業界早前聯手舉辦招聘會，點知全日只係請到五個人。
