城中鏡：仁愛堂關懷長者 拍賣籌款頌親恩
下個月就到母親節，仁愛堂尋日趁呢個機會舉辦「頌親恩、獻關懷」慈善晚會，拍賣多幅版畫連同美酒，善款撥捐「仁愛堂長者愛心卡計劃」，津貼缺乏子女同親人照顧嘅六十五歲或以上長者，享用仁愛堂轄下醫療、膳食同康樂等服務，為獨居長者生活增添暖意。
吳明珍（前左一）上任後首次搞大型慈善活動，長者學苑發展基金委員會主席梁智鴻（前左二）、仁愛堂兩名副主席鄧錦雄（前右二）同李愛平（前右一）等全力支持。
王傲山每個禮拜都會抽時間陪爸爸食飯，今年仲準備咗份特別禮物畀對方。
劉海航（左起）帶埋外母同太太一齊撐場，做善事之餘又可以陪家人。
「悅心齋」畫廊董事蕭萍首次同仁愛堂合作，希望可以幫到啲獨居長者。
悅心齋捐出七幅版畫
今次係新任仁愛堂主席吳明珍四月上任以嚟第一次搞嘅大型活動。講起頌親恩，佢甜絲絲咁讚自己囡囡好孝順，每年都會一早留意定佢鍾意咩禮物，好似手袋或者首飾咁，然後喺母親節當日送畀佢，所以一定啱心水。
佢又透露，今次選擇以拍賣版畫同美酒籌款，主因係「悅心齋」畫廊嘅靚靚董事蕭萍，同今次捐出名酒嘅酒莊老闆係老友，經介紹後覺得今次活動幫到啲獨居長者，好有意義，於是決定一齊參與，最後「悅心齋」一共捐出七幅版畫作慈善拍賣。
新主席首次搞活動，一班副主席同總理當然一早到場支持，當中唔少帶埋家人。其中總理劉海航就帶同太太與外母一齊嚟撐場，做善事之餘又可以陪家人，配合主題又溫馨。另一總理王傲山話每個禮拜都會陪爸爸一齊食飯，對衣着好講究嘅佢，嚟緊仲預備咗一份特別禮物畀爸爸，就係一套度身訂造嘅西裝嘞！皆因為人父母總係將錢花晒落子女度，但往往唔捨得用喺自己身上，好多衫一着就好多年，所以佢今次就要幫爸爸添番套新裝。
轉頭見仁愛堂副主席李愛平喺版畫前駐足欣賞，原來佢曾經跟嶺南畫派大師趙少昂學過畫畫，係趙大師嘅最後一批學生，後來師傅百年歸老，佢亦自覺天分一般，因此冇再畫畫，但就好鍾意欣賞同收藏唔同種類嘅畫作，包括著名藝術家黃永玉嘅作品。佢話家中小朋友對得啲收藏品多，無形間亦培養咗佢哋對藝術嘅興趣同靈感。
