政壇：搞搞政：長毛宣誓當食生菜 工聯會方案奈佢唔何
政改第一輪諮詢下個月初就結束，工聯會尋日亦就二○一七年特首選舉「交功課」。佢哋嘅方案要求參選特首嘅人士喺報名時就作出聲明，表明要擁護《中華人民共和國憲法》同《基本法》，同埋保證效忠香港特別行政區。工聯會榮譽會長「棠哥」鄭耀棠就話，做特首都要宣誓啦，所以聲明係好自然嘅事。其實立法會議員「長毛」梁國雄次次就職宣誓時都整色整水，對佢嚟講，宣誓簡直當食生菜，相信棠哥呢棵「生菜」難唔倒佢。
設計圖片及對白
工聯會嘅方案同建仔嘅方案可謂大同小異，參選人都係要得到提名委員會過半數票，先可以「出閘」成為特首候選人，但佢哋除咗建議嘅候選人數目係兩至三人，仲少過建仔之外，更比建仔多一道閘，就係要聲明擁護中國憲法同《基本法》兼效忠香港。對於被質疑係多一重篩選，棠哥就話反正當選後都係要宣誓，做得特首就要拋個身出嚟為香港服務、效忠香港，所以佢哋嘅方案有呢個要求都係好自然嘅事。
棠哥又話，佢哋嘅方案只要求有百分之五嘅提委會委員支持就可以報名參選得首，並冇限制任何人參選，仲話泛民入面都有愛國愛港嘅人，叫佢哋要解開心結喎。講開又講，工聯會前立法會議員潘佩璆早前患上重病，要做手術同成日出入醫院接受療程，淡出咗政圈一段時間，尋日就罕有現身工聯會嘅記者會。但其實佢唔係工聯會政制專責小組成員，原來佢今次重出江湖，主要係幫工聯會手回應傳媒嘅英文提問，認真唔話得。
