韓劇《來自星星的你》落畫一段時間，但星星效應停不了，上禮拜莎莎率先請咗金秀賢嚟香港見粉絲，成功飲咗頭啖湯，連證券分析報告都借星星之名，寫吓報告，可能認為可以吸引到大家嘅眼球。

交銀國際出咗份莎莎報告，就以「金秀賢效應」為主題，落力唱好莎莎嘅前景。不過，作用似乎唔大，莎莎股價尋日跌咗超過五個巴仙。

份報告列舉咗四個撐莎莎嘅理由，其中一個就係星星金秀賢效應，除咗佢代言嗰隻「Beyond」品牌好賣，仲話整體上莎莎嘅韓國產品喺呢幾個月嘅銷售都好勁。另外，交銀又話估計莎莎今個月嘅銷售唔錯，跑贏同行咁話，加上內地業務嘅最差時間已過去等等，所以佢哋就好「buy」莎莎嘞！

講開又講，星星股仲有隻新秀麗，金秀賢代言其中一個系列，有啲產品喺韓國一度賣斷貨，聽講嚟緊八月新秀麗會請金秀賢嚟香港出席活動，唔知到時仲會唔會有咁大嘅星星效應呢？

第一手消息請下載on.cc東網iPhone/iPad/Android/Windows Phone Apps