政壇：李嘉誠盼醫管局續支持寧養

李嘉誠基金會○七年起同醫院管理局合作，推行《人間有情 ─ 香港寧養服務計劃》，過去六年以嚟，一群醫護人員同服務團隊讓二萬七千名末期癌症病人得到適切支援。為向守護天使打氣，基金會主席李嘉誠上禮拜五喺報章刊公開信，衷心感謝各醫護人員同服務機構團隊無私奉獻，佢仲同寧養服務合作夥伴聚餐，分享助人路上點滴。

李嘉誠（右一）同醫護人員交流對計劃嘅意見，右二為梁智仁。

李嘉誠話，對於喺生命邊緣掙扎嘅病人，寧養工作就如畀渴者一杯白開水，平靜、和暖，減輕身心痛楚，咁有意義嘅工作，應該延續落去。佢又希望醫管局繼續支持寧養服務，將支援病人嘅力量發揮到最大。醫管局主席梁智仁感謝李嘉誠對提升香港公立醫療服務嘅貢獻，而寧養服務計劃更造福有需要病人及其家屬。

李嘉誠基金會至今捐資逾一億二千六百萬元，超過二十三萬人次受惠，除咗喺生命邊緣掙扎嘅病人，仲向約二千名兒童同超過一千三百個家庭提供哀傷輔導服務。