政壇：廣東社團總會 五區開檔直選
之前都講過將喺六月換屆嘅廣東社團總會（總會）爆發爭位戰，全國政協常委陳永棋同客屬社團聯合總會會長梁亮勝，都有意爭做現任主席王國強嘅繼任人；現時由楊志紅出任嘅「大內總管」秘書長職位，亦有唔同派系嘅人爭住做。消息話呢場爭奪戰經已落幕，陳永棋最後大熱跑出擔任主席，秘書長就由王國強老友、香港專業人士協會前主席簡松年接任。
雖然新領導層未上任，但據聞已有新搞作，為未來三年任期內嘅工作做好規劃，其中一個重要舉措，就係首次打正總會嘅旗號，按照立法會五大選區劃界，分別開設五個地區辦事處，目標係喺今年內成事，令人懷疑總會欲由過往選舉票倉兼地區樁腳，轉型為直接派人角逐嚟緊幾年嘅各級選舉。
據聞有人粗略估計，有關嘅開支每年至少要幾千萬元，好彩總會內最唔缺嘅，就係肯為國家同香港嘅繁榮穩定「貢獻」嘅有錢人，相信資源絕對唔係問題。問及總會又出錢、又出力，將來會否直接派人參加未來嘅多場選舉，消息人士對此就不置可否，只係話要先做好地區工作喎！
另一項新動作就係改革總會嘅領導架構，據聞會喺主席同副主席之間，再加設多一層常務副主席職位，專畀本港各個廣東縣市同宗族嘅社團領導人出任，因此梁亮勝可透過客屬社團聯合總會代表名義升任常務副主席；至於原有嘅副主席位置，則留畀有關社團嘅第二梯隊出任。
