政壇：李大壯寸學民仔 搞佔中好難搵工

大壯分析，台灣班學生搞學運可以係「career」，唔怕被政府打壓同坐監，因為放監後可以戴住呢個光環從政，選立委、選市長，甚至選總統，就算唔想從政改為打工從商，都有大把台灣企業爭住請佢哋。但反觀香港，雖然擁有思想同言論自由，啲學生嘅思想、立場同言論有幾激都得，但一旦犯咗事留下刑事案底，就好難搵到人請你，可見香港情況同台灣根本唔同。

料好快報美名牌大學

講到學運點可以唔提學民思潮，大壯直情話班學民仔年輕人好醒目，估計佢哋搞完學運未必加入政圈，好似黃之鋒等人，應該好快申請美國名牌大學，打正學運領袖旗號申請嘅話，屆時分分鐘連學費都唔使畀，仲有獎學金添。

大壯尋日見記者其實並非想講反服貿，而係想向傳媒簡介「商合會」未來一年有乜目標，除咗喺台灣舉行港、台兩地關於物流、航運同金融嘅研討會外，亦會繼續就兩地發展提出意見，例如建議開通香港直飛台北松山機場嘅航線等。當然啦，大壯話最想見到港台兩地可以簽署更緊密經貿合作安排，便利兩地投資者，因為有投資就有就業，相信無人會反對啩。