盛傳食甜品可以減壓，話說立法會議員「田二少」田北辰趁住復活節假期，日前去咗韓國首爾旅行，期間去到咖啡店就叫咗杯特大嘅綠茶雪糕，莫非佢嘅工作壓力好大？

田北辰話喺韓國食完呢杯雪糕，返香港就要積極減肥。（受訪者提供）

田二少喺社交網站留言兼貼咗張相，話當時佢已經食飽，原本只係諗住坐低歎杯咖啡，點知就畀綠茶雪糕吸引住，搞到佢都要投降食埋一份，仲聲言返港後要積極減肥。睇到佢咁講，有網民就即時回應，話佢返港後好多嘢做，唔使刻意減肥都會瘦番。

呢位網民又講得冇錯喎！除咗泛民主派議員會喺下周三嘅立法會大會就預算案撥款條例草案拉布之外，接住立法會鐵路事宜小組下月初開會討論高鐵延誤事件，身為小組主席嘅田二少到時一定會同其他議員一齊鬧埋港鐵，睇怕佢肯定會激氣到瘦喇！

第一手消息請下載on.cc東網iPhone/iPad/Android/Windows Phone Apps