其實海洋公園入場門票貴已經唔係一件新鮮事，但唔知係咪復活節放假冇嘢做，立法會勞工界議員Bill鄧家彪尋日就發表一個有關動物園嘅調查，促請政府喺香港興建大型動物園，等家長同小朋友就算唔使去海洋公園，都有機會接觸更多動物喎！

鄧家彪（左）建議政府興建大型動物園，讓小朋友有機會接觸更多動物。（受訪者提供）

喺三千三百多份問卷中，九成二受訪小學生希望香港興建大型動物園，大部分都希望香港可以喺外地引入長頸鹿、大象、袋鼠等陸上動物。佢哋認為現時主題公園門票價格太貴，兩成七受訪者覺得動物園應該要免費開放，三成六小朋友就認為票價一百元內先算合理，暗示海洋公園應該大幅減價。

不過，即使海洋公園減票價，始終都係睇唔到長頸鹿、大象、袋鼠等陸上動物，所以阿Bill要求海洋公園減票價之餘，係咪應該主力要求政府興建一個具規模嘅動物園呢？話唔定到時可以將海洋公園嘅大熊貓搬到新建嘅動物園添！

第一手消息請下載on.cc東網iPhone/iPad/Android/Windows Phone Apps