城中鏡：沙圈擺花趨吉避凶
尋日沙田馬場有賽事，記者見到馬匹亮相圈（沙圈）內圍擺放咗一批新花槽，雖然美觀，但原來並唔係因為復活節而布置嘅裝飾，咁到底有乜用途呢？有馬主估計，花槽可能係用來當分界線，等啲馬主同嘉賓影相嗰時唔會愈行愈出，唔使驚嚇親啲賽駒咁話，但亦有馬主擔心，當馬匹行過時可能會唔小心踢到啲花盆喎！
史立德（右三）帶埋太太史顏景蓮（右二）、囡囡史佩加（右一）、好友懲教署署長單日堅夫婦（左三及二）同萬利玩具主席陳明耀等為愛駒打氣。
沙田馬場沙圈尋日開始擺咗啲花槽喺度隔開馬主、嘉賓同啲賽駒。
葉錫安自爆有畏高症，所以唔怕會上雪山而遇上雪崩。
當作界線 防患未然
經常入馬場嘅沙田區議會前主席韋國洪話，好多時帶啲親戚朋友入場，都鍾意影相留念，但啲賽駒其實對人類聲音同動作都好敏感，而較少入馬場嘅人又唔知沙圈有條暗綠色分界線，有時大家背住啲賽駒影相，唔覺意行得太近，嚇到啲賽駒起腳踢親佢哋就唔好啦！
作為馬主嘅史立德就擔心，有時啲馬匹行過時，如果唔小心踢到啲花槽就可能有危險。不過，佢尋日帶家人同朋友入場捧愛駒時，都認同擺咗花槽之後，大家會意識到條界線，唔會行得太出，如果好似以前咁次次要職員提示大家行番去界線內，就唔係咁好意思喇！
馬會方面就話擺放呢啲花槽嘅真正原因，亦同大家估計一樣。事緣佢哋發現好多馬主同朋友都鍾意同馬匹影相，為咗避免人同馬匹有碰撞，最好就係擺啲花喺度隔開，防患於未然。
同場見到馬會副主席葉錫安，平日好鍾意滑雪嘅佢，講起上周珠穆朗瑪峰嘅雪崩意外時，就話太太並唔擔心佢滑雪有危險，因為佢畏高所以唔會上雪山，只會去一般滑雪景點滑雪。
