多次深受立法會預算案「拉布」之苦嘅財爺鬍鬚曾，前日發表網誌反擊上星期社民連嘅議員「長毛」梁國雄向佢撒陰司紙，諷刺激進泛民議員「做騷」攞威，係欺善怕惡嘅挑釁者，而佢回應一句「行開啦」已經算係好得體。

長毛直指鬍鬚曾係顛倒是非。

長毛尋日出席融樂會活動，事後有記者想問「拉布」修訂案，但佢就等唔切，主動話要回應鬍鬚曾嘅言論，質疑鬍鬚曾坐擁龐大財政儲備，唔推全民退休保障先至係恰緊一班冇權嘅長者，自言係「仗義每多屠狗輩」，挑機話要同鬍鬚曾公開辯論添！

長毛話長者冇權冇得反抗，但鬍鬚曾有特權，但寧願用嚟做未來基金，都唔花五百億元做全民退保，直指鬍鬚曾係顛倒是非，而佢拉布只係「輕微反抗」。

至於鬍鬚曾透露以前喺美國試過講句「Go Away（行開啦）」、甚至用「助語詞」對付「爛騷」，長毛話佢自己都好想講粗口，但就回應「Go to Hell（去死）」，諷刺番鬍鬚曾喺人間阻住晒喎！

第一手消息請下載on.cc東網iPhone/iPad/Android/Windows Phone Apps