政壇：建制派鬥出招抗拉布
立法會下周三將會開始審議議員就財政預算案提出嘅拉布式修正案，雖然主席曾鈺成上周以瑣碎無聊為由率先剪走議員「長毛」梁國雄提出嘅九百零九項修正案，但仲有九百六十項修正案有待審議，未計議員可以不停發言拉布，淨係投票都要投足幾十個鐘，簡直就係浪費青春。有建制派議員不甘淪為小丑，於是趁仲有個幾星期時間，提早計劃定到時有乜好做，當中包括睇書、睇戲、織頸巾等「瑣碎無聊事」，總之就唔想到時呆坐成個月，正中「拉布」議員下懷。
身兼電影發展局主席嘅體育、演藝、文化及出版界議員馬逢國投訴「拉布」議員浪費立法會寶貴時間，佢自爆已經諗到好橋抗「拉布」，就係喺議事廳內睇戲。佢話自己一向有唔少電影想睇，但就一直因為事忙而未能成事，如今拉布起碼拉足大半個月，令佢可以有時間同機會不斷睇戲燒時間，又話反正留喺會議廳都唔知做乜好。
AV仁開會睇艷照無恥
不過，工聯會黃國健舊年「拉布」時被傳媒影到喺議事廳入面睇《九品芝麻官》，唔知馬逢國今年睇戲又驚唔驚會被人鬧呢？佢就理直氣壯話，自己作為文化界議員，有責任要了解業界發展情況，就算被人影到都只會用「無可厚非」四個字來回應。
議員陳恒鑌就會趁「拉布」睇埋本睇咗好耐都未睇完嘅書《群眾運動》，同埋織埋去年「拉布」至今都未織得晒嘅頸巾。陳恒鑌話去年條頸巾已經織咗三分之二，今年會織埋其餘嗰三分之一，之後就會送畀一直幫佢手嘅女義工。
雖然市民可能會覺得議員喺議會內做其他嘢係浪費公帑，但總好過白鴿黨「AV仁」何俊仁咁公然喺會議廳內睇模特兒艷照，之後仲辯稱係無心之失咁無恥吖！
