前高層利益衝突 民航處官官相衞

太一叮之所以重提舊事，皆因民航處最近亦爆出類似醜聞，一名前民航高官有份批出航空交通系統標書之後，離職後居然加入相關公司工作，你話無問題都無人信喇。

件事係咁嘅。本報舊年踢爆民航處耗資五億元向美國雷神公司購買一套新航空交通管理系統，購入兩年後因為技術問題仍然「有得睇、冇得用」，令人懷疑係咪入錯貨。事件最近有新發展，當年有份參與審批標書嘅前民航處總航空交通管制主任梁沛光，離職後居然加入雷神喺香港嘅分判公司，涉嫌利益衝突。更離譜嘅係，本報舊年向民航處查詢時，該處白紙黑字回覆話梁沛光並非有關審標成員，點知事隔唔夠一年啫，該處又自打嘴巴，承認梁沛光係審標成員。

事情非常清楚，一份標書涉及三件醜聞。第一，民航處懷疑買錯貨，新空管系統睇得唔用得；第二，有人涉嫌圍威喂食大茶飯，你醒我一份合約我送你一份筍工；第三咯喎，就係民航處公然講大話，擺明包庇自己友，隱瞞真相。當然啦，你亦可以話三件醜聞其實就係同一件事，正如立法會議員話齋，成件事令人有合理懷疑涉及利益衝突，甚至有人打龍通集體謀取利益，民航處必須公開交代，廉署亦有必要介入調查。

冇錯嘞，廉署的確有必要深入調查o架，民航處早就醜聞多多，依家仲爆出利益輸送嫌疑添，咁仲得了嘅？咪話太一叮唔提醒，「貪曾」曾蔭權在位時大玩官商勾結、利益輸送，已經搞到官場烏煙瘴氣，如果廉署任由呢股歪風蔓延，坐視民航處官官相衞藏污納垢，成個港府遲早變成貪官俱樂部嘅咋，到時香港想唔玩完都幾難！

提起民航處嘅醜聞，可謂說來話長。就講該處耗資二十億元公帑興建嘅新總部大樓吖，被本報多次揭發大花筒，一時淪為濫裝大電視嘅「電視城」，一時淪為設有超豪淋浴間嘅「大浴場」，簡直揮霍無度。而講到最無厘頭，都係嗰個三面鑲鏡及設有芭蕾舞扶手嘅「專業舞廳」，唔知民航處高層平時喺裏面係玩跳舞定玩跳飛機呢？

事實證明，要防止官場貪風蔓延，除咗靠廉署，正義傳媒發揮第四權更加重要。嗱，太一叮再次提醒當局，民航處烏煙瘴氣，係時候整頓喇，叮！