仲記得喺早幾年前，非牟利組織中華仁人家園曾經幫大澳嘅棚屋復修保育，原來佢哋近年仲定期北上為連片瓦遮頭都冇嘅偏遠地區居民起屋，下星期佢哋就會去廣東及浙江省幫手起樓喇！

嚴啟泉尋日坐上電車為建屋之旅瞓身宣傳。

仁人家園行政總裁Kester嚴啟泉話，本港其實都有唔少日久失修嘅危樓需要翻新，早年佢哋幫大澳棚屋維修，改善該區居民住屋情況，目前有九十幾間已經完成修建工程。佢哋亦非常關注內地嘅貧窮住屋問題。Kester曾經喺內地工作，見識過內地偏遠地區環境有幾惡劣，用樹皮或紙皮搭建臨時屋嘅大有人在。所以今個月中旬，佢哋會帶一班建屋大使去內地，為村民興建房屋。

Kester又話投身公益事業後先至真正明白乜嘢係「開心」，仲話發現非牟利組織嘅員工以女性佔大多數，盛讚女仔補牆灰時手工特別靚喎！

第一手消息請下載on.cc東網iPhone/iPad/Android/Windows Phone Apps