城中鏡：嚴子杰跟拳王學搏擊
如果做運動怕悶咁點算呢？仁濟醫院前主席嚴玉麟嘅大仔Jacky嚴子杰正因為咁而愛上泰拳。大約半年前，佢重遇贏得兩屆冠軍嘅香港輕量級拳王Kaman郭家文，於是搵Kaman做星級私人教練。
郭家文（右）畀貼士嚴子杰（左），打好泰拳秘訣係「企得穩」。
嚴子杰（右）肉緊出擊，郭家文（左）輕鬆接招。
郭家文取得輕量級拳賽冠軍嘅兩塊腰帶。
訓練過程十分艱苦。
太太實地視察放心晒
Jacky話幾年前曾經同朋友一齊玩過泰拳，後來因工作忙碌而停止，當時佢同Kaman已有一面之緣。半年前佢重遇Kaman，知道Kaman同朋友喺鰂魚涌開設一間六千呎嘅拳館，所以就搵佢做師傅，重拾練拳樂趣。Jacky好鍾意運動，閒時會約朋友踢波、打籃球，但佢認為泰拳勝在冇咁悶，又可以學到搏擊技術自衞，一舉兩得。
講起拳王，咪以為一定係大隻佬，Kaman就好斯文。佢笑笑口話好多人都唔信佢玩泰拳，可能外界對泰拳有誤解，以為好暴力，其實泰拳都係正當運動，仲可以減壓。講起入行故事，都係誤打誤撞。佢話十年前做救生員，有次健身教練介紹佢接觸泰拳，點知就咁打出興趣，兩年後更一舉奪下香港輕量級拳王。佢仲話開設拳館目的係培養人才出賽，亦方便自己日日練拳，隨時備戰。
Jacky話太太初時都唔放心畀佢學泰拳，怕出入嘅人品流複雜。後來太太同佢一齊到拳館幾次之後就放心晒。佢聽聞Kaman嘅拳館遲啲打算開埋瑜伽課程，心思思帶埋太太一齊去，咁就可以一齊拍拖兼做運動喇！
