政壇：搞搞政：上海行淪布景板 黃定光呻受冷待

據聞立會秘書處要求鴨仔團盡量帶手提行李，避免去到上海機場後要等寄艙行李，費時失事。有個別建制派男議員就勁不滿，投訴話一個篋仔點裝得晒喎！又聽聞秘書處要求鴨仔們去到機場後，一律使用政府貴賓室等待上機。擁有一張某航空公司白金卡，可以免費享用該航空公司貴賓室嘅「象哥」黃定光就勁呻話，政府貴賓室入面只有餅乾，冇乜嘢食，唔似嗰間航空公司貴賓室有免費零食同埋雲吞麵，食到飽飽再上機都未遲，一諗起覺得唔開心喎！見佢咁大個男人咁為食，講到扁晒嘴，真係搞笑。

咁都不特止，就連唔知點打發時間都有得投訴。事關佢哋星期日回程當日午後先同兩位京官會面，根據劇本，建制派早喺兩點半已經要自動消失。但秘書處就安排議員當日五點半坐車離開酒店去機場，當泛民同中央官員會面嗰陣，建制派議員都唔知可以去邊度打發時間，得嗰兩小時，想去得遠啲又唔得，唔通同在場守候嘅傳媒一齊吹水咩？不過，個別有米議員就冇咁好氣，寧願畀多啲錢改機票提早返港，費事留喺上海虛度光陰。