胡志偉絕食第十三日要着羽絨，但講嘢依然有氣有力。
泛民絕食爭普選行動踏入第十三日，剩低嗰三人聲稱已連續絕食咗逾三百小時，其中白鴿黨議員胡志偉尋日仲返咗立法會參與預算案二讀辯論。記得舊年聲稱絕食咗十日嘅人民力量議員「慢必」陳志全，一返到立會開會冇耐就當場暈低咗，但胡志偉發言時絕冇「揸流攤」，鬧起政府上嚟依舊中氣十足，點睇都唔似已經冇食嘢近兩個星期。
不過，胡志偉就話體重已勁跌咗十六磅，體溫亦較正常低，只有三十六度，因此尋日陽光普照，都要着番件羽絨背心，令人睇見都一額汗。
講開胡志偉，前日佢喺報章撰文，質疑政府就發展東大嶼都會提出嘅人工島填海計劃，將長洲以南同南丫島都包括在內，形容計劃暗藏「殺島」危機。發展局尋日喺專屬社交網站上澄清，當局並無計劃喺長洲同南丫島之間嘅水域填海，不點名批評有關說法係「危言聳聽」，對此「深表遺憾」。唔知佢係咪冇食嘢太耐影響視力，睇錯咗啲填海文件同圖表呢？
第一手消息請下載on.cc東網
