尋日花生友認真過夠癮，英國《金融時報》報道人行同中銀監唔妥對方，互相杯葛，搞到《金融穩定會議》都一拖再拖。其實，時不時聽聞各地監管方內訌，但正所謂寧畀人知，莫畀人見，人行極速發公告反駁，表示同銀監會「嚴厲譴責」英國《金融時報》不負責嘅行為。
英國《金融時報》話，周小川領頭嘅人行唔滿意中銀監搞唔掂中小行啲問題貸款，又同大行過分熟絡，總之就辦事不力。由尚福林話事嘅中銀監就反駁，人行喺雷曼事件後係咁放水，一手造成貸款問題，依家債務危機殺到埋身就要中銀監孭鑊，指摘對銀監好唔公平。
有知情人士透露：「周小川可以向最高領導層進言，銀監會對呢點好唔高興。」今年六十六歲嘅周小川係太子黨，過晒退休年齡都仲受國家主席習近平重用留職，地位唔講都知有幾堅，亦因此惹來不少閒言閒語。
之不過，人行尋日下午即發出通告，怒插英國《金融時報》「文章內容與事實嚴重不符，肆意歪曲事實」，仲以「人民銀行和銀監會共同表示嚴厲譴責！」作結，等大家睇睇佢哋幾咁齊心，絕無不和。
第一手消息請下載on.cc東網
