許智峰（右）為咗助理手中嘅錄影機擺位，嘈足四十五分鐘。
話說中西區區議員許智峰不滿區議會撥款二十五萬元畀團體推廣《基本法》，件事已擾攘成個月，尋日區議會再次開會，點知又係鬧劇收場。無論係許智峰定係建制派都好似「小學雞」咁，不停為啲芝麻小事鬧嚟鬧去，令會議足足三個鐘至開完。
會議一開始，許智峰堅持將錄影機擺喺會議枱上，主席葉永成叫佢擺番喺公眾席。兩批人因為一部機嘅擺位，嘈足四十五分鐘。當白鴿黨增選委員吳兆康想幫口時，區議會副主席陳學鋒突然大佬上身鬧話：「呢度唔到你講嘢！」最終大家又浪費十分鐘去討論增選委員應唔應該出聲，真係小學雞到爆。
期間區議員陳捷貴話容忍許智峰擺部機上枱，點知許智峰發言時形容大家係小學雞，陳捷貴即刻收番自己嘅「容忍」，咁都得？原本有十三位建制派議員一早預定會後召開記者會譴責許智峰，點知搞得太耐，開完會個個雞飛狗走，得番九個人出席。兩班人都將區議會當成街市咁，真係得啖笑。
第一手消息請下載on.cc東網
