醫生同病人嘅關係就好似一對合作夥伴,必須互相尊重,互相信任,互相配合,不過喺今時今日嘅神州大地,醫患之間衝突不斷,矛盾日深,似仇人多過似夥伴。嗱,內地醫院烏煙瘴氣,唔止無良醫護唯利是圖,橫蠻病人一樣無處不在,搗亂恐嚇,敲詐勒索,唔到你唔服。

香港大學深圳醫院一二年中開始試業,之後正式營業至今,堅拒收紅包及「以藥補醫」,將香港醫院管理模式引入內地,被視為中港醫療合作嘅重要試點,不過大家唔好以為一帆風順呀,內地「醫鬧」歪風嚴重,搞到連呢間港資醫院亦無法幸免。上個月之嘛,先後有病人家屬因為不滿輪候時間過長而推撞急診科分流站護士,以及有醉酒患者喺急診科大門外毆打保安員,甚至有內地公安病人因為不滿手術後出現輕微併發症,居然囂張到出言威嚇:「醫生,我係公安,揸槍返工嘅。」大家話嘞,內地「醫鬧」係咪無法無天吖!

一節見則百節知,連港資醫院都受到百般滋擾,內地醫鬧問題有幾嚴重,更加可想而知。話時話,醫鬧歪風愈吹愈烈,推撞同威嚇醫護都算小兒科,有人橫蠻起嚟真係唔講道理o架,喺醫院設靈堂、違規停屍、聚眾滋事、毆打醫護、逼醫生遊街示眾,甚至砍殺醫生,沒有最恐怖,只有更恐怖。史書記載,神醫華佗死於病人曹操刀下,其實,呢類悲劇今日已經見怪不怪咯。

講起真係可悲,部分中國人唔止自私自利,而且粗暴橫蠻,不可理喻。醫院本來係充滿愛心嘅地方,點知家陣變咗暴戾嘅戰場;醫生同病人本來係互相信賴嘅夥伴,點知家陣變咗互相防範嘅敵人,咁嘅社會仲有乜道德文明可言?不過又好難怪嘅,內地醫療制度千瘡百孔,醫院淪為唯利是圖嘅謀人寺,白衣天使淪為見錢開眼嘅大惡魔,唔少病人任人魚肉,投訴無門,真係乜都做得出o架!

正所謂,上樑不正下樑歪。內地官場貪腐成風,社會道德淪喪,點可能唔烏煙瘴氣吖。可以咁講,醫鬧現象其實係整個社會嘅縮影,大家不妨睇吓,無良奸商可以為咗賺錢而炮製黑心食物,無良企業可以為咗節省開支而罔顧公德污染環境,再咁落去,莫講話醫院變閻王殿,成個中國都就快變人間煉獄吖!

無論點都好,正如有「鐵醫」之稱嘅港大外科學系主任盧寵茂話齋,港大深圳醫院嘅貢獻係將香港公立醫院管理模式引入內地,對醫鬧行為一定零容忍。冇錯嘞,內地當局真係要諗辦法撥亂反正呀,叮!

第一手消息請下載on.cc東網iPhone/iPad/Android/Windows Phone Apps