有「股壇球癡」之稱嘅恒豐證券研究部董事Simon林家亨，贏咗今年第一場波喇！眾所周知，佢出咗名鍾意打羽毛球，每個禮拜都會打波兩次，仲要係風雨不改嗰隻，認真神心，難怪佢同Partner加埋成百歲，可以鍊贏廿歲小伙子。

林家亨（右三）炒股不忘打波，實行健康生活喎！

Simon今次係同波友一齊參加城市大學舉辦嘅羽毛球比賽，並以男子雙打組合出戰，經過連場激戰，最終奪冠。佢話：「好彩平時勤有功，個個禮拜都有練波，所以今次都唔使特別為比賽備戰，不過我同隊友加埋嘅年齡都超過一百歲，拎亞軍嗰兩位年輕人先得二十幾歲，佢哋體能好，搞到我成場比賽跑嚟跑去，打到一身汗水，幸好最後都贏咗冠軍，印證有付出一定有回報道理。」

比賽當日Simon嘅靚靚老婆Maggie都有到場支持，仲拎起相機拍下戰況，果然係圈中模範夫妻！

第一手消息請下載on.cc東網iPhone/iPad/Android/Windows Phone Apps