近年香港興起惜食風,小寶慈善基金創辦人Gigi董愛麗因為唔忍心見到老人家執紙皮維生,於是成立惜食堂為佢哋送上愛心熱飯,三年來漸受社會肯定,「惜食」兩字亦成為潮語。不過,惜食堂位於小西灣嘅中央廚房,租約將於今年七月屆滿,上海總會理事長王緒亮收到風,立即號召同鄉出資千萬元鼎力支持,實行為善不甘後人。

王緒亮(左)同董偉(中),以行動支持董愛麗。

忙碌嘅惜食堂廚房一角。(受訪者提供)

暖笠笠嘅愛心飯盒。(受訪者提供)

Gigi係上海人,父親董偉係上海總會副理事長。睇住Gigi長大嘅王緒亮話,惜食堂每日提供三千個飯盒畀有需要人士,佢聽聞惜食堂中央廚房租約快到期後,立即提議總會出力支持。

理事會早前已一致通過伸出援手,依家正物色近五千幾呎廠房,以總會名義購入後,再以象徵性租金租畀惜食堂,以解決廚房經常被迫搬遷嘅問題,估計涉資近兩千萬元。

囡囡有慈悲心 董偉倍感欣慰

王緒亮話上海總會唔止同鄉聯誼會咁簡單,亦係慈善團體,多年來支持好多慈善活動。今次出手幫助惜食堂,一來可以減少廚餘,二來解決貧困人士溫飽,三來可當係總會嘅物業投資,十分划算。

董偉對囡囡咁有慈悲心感到好欣慰,佢憶述三年前Gigi提起要做惜食堂,將超市回收嘅食材製成飯盒,送畀啲唔方便煮餸或落街買飯嘅長者,佢即時舉手贊成。

自細衣食無憂嘅Gigi依家全職行善,兩個囡囡亦跟住佢做義工。講起成立小寶基金緣起,佢話當年家婆去世後留下一筆錢,佢同老公商量後決定以奶奶名義做善事,後來就專注做好惜食堂。俗語有話「相由心生」,Gigi心地咁好,難怪愈睇愈靚女啦。

第一手消息請下載on.cc東網iPhone/iPad/Android/Windows Phone Apps