內地有傳言指「家有羅漢松,一世不用窮。」沙田排頭村原居民藍煌帶(藍伯),四十年前於屋前栽種一棵羅漢松,「人哋話羅漢松係風水樹,所以好值錢,但我種羅漢松純粹為興趣。」多年來藍伯親手澆水修剪,羅漢松快高長大。卻萬萬想不到,羅漢松估值八十萬,早被人覬覦,於一天早上不翼而飛,令藍伯一家及愛坐在樹下乘涼的街坊鄉里都忽然失去某種慣性。「對佢有一份多年感情,我哋依家都好掛住棵樹。」

四十年前藍伯在村屋前園親手栽種一棵羅漢松,被賊人斬樹盜走。

門前最高植物為羅漢松,高一米橫向四米,估值八十萬港元。

舊日樹蔭下的位置仍放着膠櫈,街坊依舊習慣坐在櫈上。

藍伯為排頭村原居民,喜愛在庭園栽種。

「幾年前有人出價五十萬,買我棵羅漢松,我唔肯,因為我覺得感情唔可以用錢衡量。」七十一歲的藍伯退休前是買賣凍肉雜貨商人,一家生活小康,愛用空餘時間打理庭園。「以前沙田有唔少花園同山頭,出名植物靚,所以有好多花農喺度賣花、樹同種子。」藍伯當時貪得意,用八十元買了一小棵海島羅漢松,置於屋前花園。「我定時定候都會同佢澆水『剪髮』,種下種下就四十年,依家仲大過我兩個仔!」

植根屋前只為興趣

在傳統寓意,羅漢松是指長壽、為家人帶來安康吉祥,亦有助修心。但近年,羅漢松被視為風水樹,現今普遍認為,在屋前種羅漢松,可旺宅益主,招財開運,內地則認為「家有羅漢松,一世不用窮。」因此,不少內地人買羅漢松來裝飾家居,令需求大增,而藍伯所種高一米橫生四米的羅漢松更升價萬倍。

但他卻指栽種羅漢松只為興趣,「我從來唔信風水,種咗咁多年亦唔覺得好運咗。」

藍伯與兩子、媳婦及孫兒同住於五號村屋,其祖輩已在村內居住了百多年,他的居所亦被列為二級歷史建築。「以前我花園有魚池,養咗三、四條錦鯉,黃昏時,羅漢松倒映喺池面,相映成趣,真係好靚。」藍伯默然望着屋前花園,一臉不捨。

擔心棵樹生得唔好

「有晚凌晨三點,我聽到門外傳出響聲,但我哋無理,點知朝早就發現棵樹唔見咗,個石屎盆得番個窿 。」藍伯發現門外有一條拖行的泥路,相信賊人快手斬樹,搬上汽車再逃往內地。「賊人狠心斬樹,仲有啲根無掘走,我擔心棵樹之後生得唔好,一定無以前咁靚咁健康。」

藍伯門外仍舊放着數張膠櫈,於昔日樹蔭下的位置,依然有兩名婆婆坐着聊天,「以前呢棵樹好遮蔭,街坊都鍾意坐喺度抖涼、談天,依家無咗好可惜。」失去一棵樹,就如失去一個四十年的慣性依靠,令排頭村的街坊都感若有所失。

第一手消息請下載on.cc東網iPhone/iPad/Android/Windows Phone Apps