財爺鬍鬚曾喺新一份預算案又再「狼來了」，恐嚇話香港最快七年後出現結構性財赤，之後又話唔會畀佢發生，總之就係自打嘴巴，尋日佢又反口喇！

設計圖片及對白

相信大家仲記得，鬍鬚曾喺公布預算案之前，不止一次嚇人，話若果開支不斷增加，但收入下降，咁政府儲備終有一日會用完，而且離呢個日子不遠，屆時可能要加稅或者開徵新稅。點知佢尋日出席香港專業聯盟午餐演講時，竟然話加稅嘅話，好多人都會覺得唔公平，而開徵新稅從來都唔受歡迎，好似早幾年提出嘅商品及服務稅，亦因為反對聲音大而擱置，所以喺依家嘅政治環境下，好難開徵新稅。

專業聯盟副主席區嘯翔索性問佢有乜好計增加政府收入，佢竟然話計就有好多，但好計就冇。咁即係點？即係周身刀冇張利，開源嘅嘢唔會做，佢又再「以今日的我，打倒昨日的我」，仲有乜信譽可言？

唔單止咁，佢又話傳媒對預算案有三大質疑，當中最致命嘅要數佢「年年估錯數」。仲話有人話佢預測未來一年財政狀況都唔準，點信佢二、三十年後嘅預測呢？當大家以為佢轉死性認低威，殊不知話口未完，佢即刻話「七年後財赤」嘅恐怖預言係長遠財政計劃工作小組研究所得，唔關佢事。仲話小組嘅預測同佢做開嘅按年預測唔同，皆因香港每年財政狀況都受外圍經濟影響，不確定性較高，長遠財政趨勢就唔同。咁講法，即係要工作小組班學者同會計師專家硬食死貓啫！

第一手消息請下載on.cc東網iPhone/iPad/Android/Windows Phone Apps