人稱「李漢奸」嘅白鴿黨創黨主席李柱銘同「民主阿婆」前政務司司長陳方安生,尋日繼續美加「唱衰香港」之旅,仲雙雙接受外國通訊社訪問,認真合拍。不過李漢奸就喺訪問中,有意無意咁自爆今次訪美疑似遭到美方冷待,令人覺得美國重視同中國嘅關係多於關注香港情況。

其實古今中外,做漢奸嘅下場十成都係用完即棄,冇晒利用價值時就畀人唾棄。李漢奸同民主阿婆今次罕有「行孖咇」出訪都搞成咁,再次證明佢哋呢兩粒舊電池,早已畀美國佬用到乾晒塘!

李漢奸喺訪問尾段透露,佢哋由紐約轉飛美國首都華盛頓後,將會獲美國民主共和兩黨嘅國會議員接見,但係規格待遇就無以前咁高。不過佢並唔承認自己係遭到冷待,只係「唔好彩」啫,又自言以前佢每次訪美,都會有人同佢講話選擇錯咗訪問時間,因為咁啱都有好多與中國有關嘅國際性議題擺咗上枱,包括之前嘅伊朗同北韓問題,以至今次撞正嘅烏克蘭克里米亞問題喎。查實伊朗、北韓、克里米亞,同美國佬關唔關注香港政改又有乜問題呢?李漢奸真係好有阿Q精神囉!

第一手消息請下載on.cc東網iPhone/iPad/Android/Windows Phone Apps